Nýr dagur , nýir tímar

Þegar að ég vaknaði í morgun vonaði ég svo innilega að Obama hefði unnið kosningarnar í USA. Ég entist ekki nema til kl 1:00 í nótt en þá höfðu fáar útgönguspár verið birtar og allt óráðið. Allt var svo í lausu lofti fram eftir nóttu og þegar að Einsi skreið upp í rúm um kl 4:00 var ekki alveg öruggt að Obama hefði unnið. En í morgun var nýr dagur, nýtt upphaf..... Obama vann. Fyrsti blökkumaðurinn til þess að gegna embætti forseta Bandaríkjanna. Obama er tákn breytinga, vonar og nýrra tíma í heiminum. Ég veit að mikið er lagt á manninn en hann er sem ferskur vindur..... hann fyllir mann von um að heimurinn verði betri staður á næstu árum. Eins ólétt og ég er og þar af leiðandi xtra væmin þá grét ég yfir því broti sem að ég sá úr vinningsræðu Obama. Þetta er söguleg stund, til hamingju heimur :)

Sund og krónan

Við Guðný nágrannabumba skelltum okkur í sund um helgina. Fórum báða dagana, syntum 500 m., fórum í pottinn, gufu og kjöftuðum um..... óléttu!! hvað annað?? ;)
Ég var miss skjaldbaka þarna á eftir Guðnýju í lauginni. Synti eins og amma gamla með sundhettuna. En allaveganna þá er sund gott á meðgöngunni, mæli með því.

Svo er maður þvílíkt ósáttur við ástandið á krónunni. Hvernig er hægt að búa á þessu landi með svona sveiflur á krónunni? Ég held að það hafi ekki verið gott að hafa Davíð eins lengi og hann var við völd. Ég meina, dont get me wrong, I like the guy (sometimes) og ber virðingu fyrir honum en... kommon???!!!! Við værum ekki í þessum vandræðum ef að við hefðum gengið inn í Evrópusambandið fyrir ca. 10 árum. Jú jú auðvitað væru hér einhver vandamál en þessar sveiflur á krónunni eru óþolandi, bæði fyrir heimili og fyrirtæki. Ok, ok ég veit að það er fjármálakreppa í öðrum löndum líka en, face it, íslenska þjóðin er EINA þjóðin, sem þarf að sætta sig við að eignir sínar rýrni um 50% á nokkru mánuðum! Ég veit t.d. um dæmi þar sem að menntuð einstæð móðir, sem keypti sér íbúð fyrir 1,5 ári, nær ekki endum saman þrátt fyrir að vinna við það sem að hún er menntuð í + það að hafa fengið sér aukavinnu!!! Er ekki eitthvað að í þessu þjóðfélagi?? Bankabækurnar og sparnaðarreikningarnir eru með áhættusamari fjárfestingum fyrir okkur, gengur þetta upp??? Ég veit að Evrópusambandið er ekki lausn allra vandamála en það er bara helvíti svekkjandi að góðærið sé meira og minna ein stór sápukúla.... allir voða sáttir meðan að vel gekk og ráðamenn sögðu "sjáiði hvað allt er frábært hérna, við þurfum ekki Evrópusambandið" og svo splash.... sprakk sápukúlan og alla svíður undan sápunni í augunum... Og við skulum ekki einu sinni byrja að tala um verðbólguna.....
Ætla að láta renna í heitt bað og slaka á.. hugsa um allt annað en krónuna ;) Annars fer ég af stað!

Lok lok og læs

Já þeir hjá blogger læstu blogginu mínu. Sögðu það potential spam blog! Ég hef því ekkert getað bloggað en þeir hafa greinilega sannfærst um að ég sé enginn spamari og hafa því opnað það aftur. Ekkert að frétta svo sem. Sá að norræni eurovision þátturinn verður ekki á dagskrá eins og sl. ár. Í stað hans verður þáttur með íslenskum spekúlöntum undir stjórn Páls Óskars. Ég er ferlega fúl yfir því að þessi skandenavíska sulta sé ekki á dagskrá. Var að fíla hana.

Dóttir mín er nú haldin alvarlegum aðskilnaðarkvíða. Hágrætur ef að hún sér mig ekki. Svo er hún skíthrædd við ryksuguna, hárblásarann og sturtuna. Algjör kettlingur. Reyndar reif hún kjaft við ryksuguna um daginn en það var nú bara af því að hún var í fanginu á pabba sínum. Hún er alveg farin að sitja og svo sýgur hún táslurnar í gríð og erg. Hún er tækjaóð og er sérstaklega hrifin af símum, fjarstýringum og tölvum. Hún er farin að vinka bæ, eða ég er ennþá að fatta hvort að það sé tilviljun. Hún fer í 7 mánaða skoðun á morgun, hlakka til.

Dómsdagsspá Seðlabankans fer í taugarnar á mér. Mér finnst skrýtið og óábyrgt að segja að fasteignamarkaðurinn eigi eftir að lækka um 30% og hægja því að einhverju leyti (og eiginlega ofmikið) á honum. Ríkisstjórnin hefur líka gefið það út að fella eigi niður stimpilgjöld af kaupum á fyrstu íbúð (sem er gott) en það að tilkynna það einungis, hægir einnig á markaðnum. Ég veit um fullt af fólki sem að á í erfiðleikum núna út af þessu ástandi og getur ekki selt eignirnar sínar. Ekki vildi ég vera í þeim sporum núna að skulda greiðslu eða já vera að bíða eftir greiðslu!

Gleði hjá litlum sjóara

Herdís María er farin að hlægja. Það er sko ekki lítið fyndið þegar að hún hlær. Það er eins og að raddböndin séu ekki tilbúin fyrir svona mikinn hlátur því hún hlær eins og rámur lítill sjóari! Hláturinn kraumar í hálsinum og sprettur svo fram eins og "whiskey woice" Við Katrín bókstaflega grétum af hlátri þegar að hún tók hláturskast. Þetta er bara það mest krúttlegasta. Núna hefur hláturinn aðeins breyst og er "mýkri" en þarna fyrst. Jæja best að fara að láta hana hlægja... ekki verra að byrja daginn á smá hlátri!

Björn Ingi bara hættur í pólitík! Þá getur maður ekki hneykslast á honum lengur. Hann má þó eiga það að hann mætti í alla sjónvarpsþætti e. Rey-málið og útskýrði mál sitt. Það var meira en að Villi gerði. Ég er eitthvað svo meir alltaf.. ég hálfvorkenni honum. Merkilegt að sjá hve stuðningurinn við nýja meirihlutann er þó mikill þ.e. 26 %. Ég hefði giskað á svona 15%.
Það eru gleðifréttir að yfir 55% vilja sjá Dag sem borgarstjóra, Villi var bara með 18% og Ólafur í kringum 5%!!!!! Pælið í því... (tölurnar eru skv. könnun Fréttablaðsins) Vonandi verður Dagur aftur borgarstjóri áður en að langt um líður. Helst vildi ég að kosið yrði aftur í Reykjavík! (úpps ég fengi ekki að kjósa enda Borgnesingur)

Sjokk

Þegar að Birni Inga var kippt upp í bátinn eftir sl. borgarstjórnarkosningar talaði ég um vankanta lýðræðisins full velgju... og nú er velgjan ekki minni. Ég bara neita að trúa því að maður með lítið fylgi á bak við sig og engan varamann eigi skilið að verða borgarstjóri "allra" Reykvíkinga. Mér finnst skömm að þessu. Ég hefði viljað sjá afsögn Villa e. Rey-málið en hann er þó miklu betri kostur en Ólafur F sem borgarstjóri og enn betra væri ef að einhver annar Sjálfstæðismaður leiddi þetta allt saman.
Mér fannst Dagur standa sig frábærlega vel sem borgarstjóri og treysti honum og Svandísi Svavarsdóttur sérstaklega vel að gera góða hluti. Þau eru fulltrúar framtíðarinnar, sama get ég ekki sagt um þá Ólaf F. og Villa. Æ mér finnst þetta allt svo ömurlegt að ég er eiginlega í sjokki! Ég er svo svekkt út í Sjálfstæðisflokkinn að láta eftir borgarstjórastólinn... ojbara... þetta finnst mér lýsandi dæmi um það þegar að menn í sárindum sínum hrifsa til sín völd án þess að hafa hag borgarbúa í huga.

Riddari á hvítum hesti

Dagur er nýr borgarstjóri í Reykjavík! Ég hef lengi haft dálæti á Degi eða alveg síðan að ég var skotin í honum þegar að ég byrjaði í 3. bekk í MR. Ábyggilega ein af mörgum.
Þá var hann í 5. bekk og Scriba. Hann gekk hnarreistur um skólann og sveiflaði makkanum gáfumannlega. Svo var hann í ræðuliðinu og skrifaði ljóð í Skólablaðið. Ég varð alveg staurblind, sá ekkert annað en hann fram að jólum.
Þennan vetur fór ég á mörg skólaböll. Mikill troðningur myndaðist fyrir utan skemmtistað, þar sem að ég beið eftir að komast á eitt þeirra. Ég lítil sem ég er, var gjörsamlega að kafna þarna í miðri þvögunni. Allt í einu var mér lyft upp úr þvögunni og borin inn af engum öðrum en nýkjörnum borgarstjóranum. Þið getið rétt ímyndað ykkur hvernig litla busanum leið! Riddari á hvítum hesti er réttnefni og nú er hann riddarinn sem bjargar borginni eða er þaggi??

ps. þessi saga er DAGsönn ;)

Eurovision og kosningar

Ég er búin að kjósa! Kaus sl. fimmtudag utankjörstaðar þar sem að ég er ekki stödd í mínu kjördæmi í dag þ.e. Reykjavík norður. Þetta kjördæmi verður svo sem ekki mikið lengur mitt kjördæmi þar sem að ég mun færa lögheimili mitt í Arnarklett 27 í júlí.. nánartiltekið þann 13. júlí. Við skrifuðum undir kaupsamninginn í gær og allt er nánast klappað og klárt varðandi þessi íbúðakaup. Þetta gekk eins og í sögu!

20. vikna sónarinn gekk einnig eins og í sögu í gær. Við Einar horfðum spennt á krílið og ég róaðist eftir því sem að ljósan taldi upp öll líffæri og útlimi. Allt virðist vera í lagi. Baunin var nú ekki í eins miklu stuði og síðast og hreinlega engin ljósmyndafyrirsæta. Hendurnar voru stanslaust fyrir andlitinu og óhætt að segja að mikið drama hafi verið í gangi þar sem að baunin bara dæsti og andvarpaði yfir þessu öllu saman.

Eurovision gekk nú samt ekki eins og í sögu. Ég var nú tiltölulega sátt samt með lögin sem að komust áfram þ.e. 7 þeirra. Var svekkt með Búlgaríu, Georgíu og óperusöngkonuna með ljósið í lófanum. Fjölskyldan sat náttla og glápti á þetta. Eiríkur Tumi fílaði Búlgaríu í botn og dillaði sér í takt við trommurnar. Pabbi pantaði pizzur frá Eldsmiðjunni og svo var rökrætt um pólitík og hlegið af lögunum í Júró. Held að okkur hafi flestum fundist Hvíta Rússland flott og Selvogsgrunn 15 spáir því velgengni í úrslitakeppninni. Annars fannst mér nú lögin frá A-Evrópu í það heila betri en lögin frá V-Evrópu. Samt ferlega leiðinlegt að Kýpur komst ekki áfram og jafnvel Malta og svo hefði verið gaman að sjá eitt Norðurlandanna. Allt þetta tal um A-Evrópumafíuna er svona soldið spes finnst mér. Auðvitað er ömurlegt að öll löndin 10 sem komust áfram hafi verið þaðan en Finnland vann jú í fyrra og Svíþjóð var í 4 sæti svo??? Grikkland vann keppnina þar áður og eru líklegir í ár. Ég þarf að spá í þessu betur. Væri samt til í að hafa 2 forkeppnir en þó aðallega út af fjöldanum. Annars stóð Eiríkur Hauks sig óaðfinnanlega en við systur hefðum viljað sjá eld eða eitthvað þvíumlíkt á sviðinu!

Jæja ég er hætt þessu blaðri. Verð að halda áfram að læra. Sifjaréttarprófið búið og stjórnsýsluréttur á mánudaginn.
Bið ykkur vel að lifa og njótið dagsins.
Eurovision og kosningar... ummmm gerist ekki betra!!!

Svo er nú dálítið kaldhæðnislegt að sama dag og Hafnfirðingar hafna stækkun álvers þá eru kynntar hugmyndir um áltæknigarð á Suðurlandi og álver opnað á Reyðarfirði. Nú fróðir menn segja mér einnig að álverið í Helguvík sé í bullandi blússi og Century-menn séu hæstánægðir með úrslitin í Hafnarfirði. Þeir eru ábyggilega á fundi núna á Háaleitisbrautinni. Ég er fylgjandi hóflegri stóriðjustarfsemi. Ég vil samt ekki grátt land. Ég er mjög ósátt við framsetningu Framtíðarlandsins á því að ef maður styður á einhvern hátt framgang stóriðju vilji maður grátt land. Ég tel að stóriðja og umhverfisvernd geti vel farið saman. Ég vil ekki að hver einasta á landsins sé virkjuð en ég er fylgjandi því að nýta landið á skynsamlegan hátt. Fyrir því eru bæði efnahagsleg, umhverfis og félagsleg rök. Ég vil að sjálfsögðu grænt land!

Pirrandi

Það munaði ofboðslega litlu að frumvarp um sölu á léttvíni og bjór næði fram að ganga en samkvæmt því átti að afnema einokun Áfengis- og tóbaksverslunar ríkisins á sölu áfengis með vínandastyrk 22 prósent eða minna. En nei nei VG voru á móti því og kæfðu þetta :(

Jahá... þetta er nú meira málið. Hvað finnst ykkur eiginlega um þessa klámráðstefnu? Við þurfum kannski ekki að hafa áhyggjur af þessu lengur þar sem að ráðstefnugestirnir 150 eru hættir við að koma. Eða er einmitt ástæða til þess að hafa áhyggjur af þessu núna? Nú þekki ég ekki þennan hóp sem að er að koma en mér hefur skilist að þetta sé aðallega fólk sem að vinnur við markaðssetningu og vefsíðugerð tengdu klámi, kannski er það rangt hjá mér?? En það skiptir kannski ekki höfuðmáli því eins og málið horfir við mér þá hefur þetta fólk ekki framið lögbrot og ætlar sér ekki að gera það hér. Það ætlaði bara að eyða peningum í Bláa lóninu og í skíðabrekkum og jamm fá sér nokkra kokteila í miðbæ Reykjavíkur. Við búum í rótgrónu lýðræðisríki þar sem að skoðanafrelsi hefur almennt verið virt og ég eiginlega skil ekki þessa hysteríu varðandi þennan hóp fólks. T.d. að tengja hann við barnaklám og mansal. Hefur einhver eitthvað fyrir sér í því? En jæja þetta lið er hætt við að koma og mér gæti svo sem ekki verið meira sama. Veit reyndar ekki með Einar, heyrði að hann hefði verið búinn að skrá sig á þessa ráðstefnu :).

Júróið og Frjálslyndir

Hvað er að koma fyrir júróið?? Þessi lög þarna sl. laugardag voru ekki upp á marga fiska, eða hvað fannst ykkur? jæja vonandi að eitthvað skárra líti dagsins ljós næsta laugardag!
Helgin lítur vel út (já það er komin helgi hjá mér!!).. fer í bæinn á eftir og ætla að taka góðan hitting með fullt af fólki þessa helgina. Ætli maður reyni ekki að líta í bók líka.
Annars þá finnst mér merkilegt að fylgjast með baráttunni innan Frjálslyndaflokksins. Horfði á Margréti og Magnús í Kastljósinu og fannst svolítið merkilegt að honum fannst sinn árangur betri en hennar þar sem að hann hefði nú komist inn á þing! Hún var samt með rúmlega 6000 atkv. á bak við sig en hann með undir 500!! Atkvæðin út á landi vega bara þyngra og í þessu tilliti er hægt að hugsa hvort að gamalt baráttumál Alþýðuflokksins sáluga, landið eitt kjördæmi!!, sé ekki sanngjarnara en núverandi kerfi?

Hugleiðingar um fóstureyðingar

Hugmyndin um réttinn til lífs hefur verið fyrirferðarmikil í umræðum um fóstureyðingar. Flestir virðast aðhyllast réttinn til lífs í einni eða annarri mynd. Hins vegar er afstaða fólks til þessarar hugmyndar mismunandi. Flestir eru á því að dráp á hvítvoðungum sé siðferðislega rangt því börn hafi rétt til lífs. Deilurnar snúast því meðal annars um hvenær börn öðlist þennan rétt. Sumir myndu segja að þau öðlist réttinn til lífs við getnað og enn aðrir þegar að okfruman hefur fests í slímhúð konu. Sumir telja að fóstrið öðlist ekki rétt til lífs fyrr en það getur lifað utan kvenlíkama meðan enn aðrir telja fóstur ekki öðlast réttinn fyrr en við fæðingu. Burt séð frá því hvenær að fóstur telst vera manneskja þá eru flestir sammála um að fóstureyðingar séu réttlætanlegar að uppfylltu því skilyrði að þungunin ógni heilsu eða lífi móður. Þeir lífsverndarsinnar sem að ganga einna lengst í andstöðu sinni gegn fóstureyðingum telja það skilyrði þó ekki nægja, þungunin verði að ógna lífi móður og þeir sem að eru hvað harðastir í afstöðu sinni leyfa ekki undir neinum kringumstæðum að fóstri sé eytt. Ég get að mörgu leyti tekið undir rök lífsverndarsinna um að fóstur sé mannvera og rétt hennar til lífs. Hins vegar þá tel ég ekki annað hægt en að taka tillit til þess hvort að réttur til lífs sé alltaf mikilvægastur. Ég get ekki verið tilbúin til þess að taka réttinn til lífs, alltaf, fram yfir t.d. almenna velferð, nauðganir og félagslega bágar aðstæður. Það er einnig ómögulegt að taka afstöðu til fóstureyðinga án þess að tengja þær jafnréttisbaráttu. Staða kvenna er á mörgum stöðum ansi bágborin og ekki annað hægt en að líta til hins félagslega þáttar.
Á málþingi um réttarheimildir sem haldið var á Bifröst 31. október sl. fjallaði Skúli Magnússon dósent við Lagadeild Háskóla Íslands um meginreglur laga. Þar nefndi hann dæmi hvernig meginreglur um gildi lífsins og sjálfákvörðunarrétt vegast á. Í dæmaskyni nefndi hann Hæstaréttardóm frá árinu 1974. Þar kom fram í máli meirihluta dómara að það væri meginregla íslensks réttar að fóstur mætti ekki deyða. Hins vegar taldi minnihlutinn nauðsynlegt að túlka ófullkomin ákvæði eftir réttarþörf á hverjum tíma. Löggjöf um fóstureyðingar hefur tekið breytingum í átt að frekara frjálsræði frá því að fyrrnefndur dómur var kveðinn upp. Löggjöfin hefur því tekið breytingum í takt við tíðarandann. Þetta segir okkur meðal annars að þegar löggjafinn hyggst setja löggjöf um umdeild siðferðisleg málefni, þá standi hann frammi fyrir ákveðnum vanda. Á réttarþróun að fylgja samfélaginu? Verður meirihluti þegnanna ekki að vera sammála löggjafanum hvað varðar löggjöf um t.d. fóstureyðingar? Hvernig getur löggjafinn tekið afstöðu til siðferðilegra atriða við löggjöf, siðferðilegra atriða sem menn eru ekki sammála um? Burt sé frá fyrrnefndum þáttum tel ég mikilvægt að halda siðferðilegu réttmæti fóstureyðinga aðskildu frá lögmæti þeirra.
Mér dettur núna í hug ákveðin bíómynd. Kvikmyndin fjallaði um þungaðar konur sem allar veltu fóstureyðingu fyrir sér. Konurnar lifðu á mismunandi tímum, félagsleg staða þeirra var ólík og efnahagur þeirra mismunandi. Margir ólíkir þættir spiluðu stórt hlutverk við mat þeirra á því hvort að fóstureyðing væri réttlætanleg. Ég tel að þegar að rætt er um löggjöf um fóstureyðingar vakni oft álitamál er varða annað en siðfræðilegt réttmæti þeirra. Vandamál sem viðkoma t.d. læknisfræðilegum þáttum, efnahagsmálum, jafnréttisbaráttu og trúarskoðunum. Þannig tel ég það mikla einföldun að halda því fram að sá sem að sé fylgjandi fóstureyðingum virði á engan hátt líf ófædds barns og sá sem að sé andvígur fóstureyðingum virði rétt konu til ákvarðana um líf sitt að vettugi.

Dagur rauða nefsins

Í gær tók ég forskot á sæluna og keypti mér rautt nef. Með það á nefinu gerðist ég heimsforeldri. Það þýðir að næstu 6 mánuði munu 3 lítil svört Afríkubörn búa hjá mér hérna á Bifröst. Nei, nei.. segi svona.... það eina sem að ég þarf að gera er að láta draga 1000 kr. af kortinu mínu. Þessar 1000 kr. (auk annarra framlaga) fara svo í aukna menntun og bólusetningar barna í þróunarríkjunum.
Þetta er það minnsta sem að við getum gert. Ert þú búin(n) að skrá þig??

Framboð og helstu fréttir

Vinur minn hann Valdi er farinn í framboð.. kíkið á síðuna hans hér

Nú svo gekk mér illa í prófinu á mánudaginn en það þýðir ekkert að fást um það meira

Fór í yoga í dag

Er að lesa fyrir kröfuréttarpróf núna

París eftir 2 daga

over and out...

Óhugur

Ég fylltist svo miklum viðbjóði og óhug í gærkvöldi þegar að ég horfði á 1. frétt kvöldsins. Tveir ógeðslegir karlmenn nauðguðu stelpu hjá Þjóðleikhúsinu. Hún var ein á gangi seint um kvöld/snemma morguns og var þröngvað upp að Þjóðleikhúsinu þar sem að þeir nauðguðu henni. Svipað atvik gerðist líka bak við MR fyrir tveimur vikum. Ég er í alvarlegu sjokki eftir þessa fréttir og mér leið svo illa í gær. Ég gat varla talað. Hversu oft hefur maður gengið svona einn um á leið heim af djamminu. Hverslags menn eru þetta?? Þetta eru ekki menn heldur djöflar í mannsmynd. Það verður allaveganna regla í vinahópnum núna að engin fer ein heim!!! Allar saman eða engin!! Víst að ástandið er orðið svona verðum við að passa upp á hver aðra og leggjast á eitt að svona menn líti ekki dagsins ljós.

Málstofa

Ég er að skrifa ritgerð um það hvort að riftun sé raunhæft vanefndarúrræði. En þetta blogg er ekki um það. (hjúkk segja sumir) Ég tók mér nefninlega pásu frá skrifum áðan og fór á málstofu um kynferðisafbrot. Ragnheiður Bragadóttir prófessor við lagadeild HÍ er ein þeirra sem að samdi frumvarp til laga um breytingu á almennum hegningarlögum. Hún var fyrirlesari á málstofu í dag og kynnti þetta frumvarp. Í þessu frumvarpi voru 3 brotaflokkar skoðaðir:

1.Nauðgun og önnur brot gegn kynfrelsi fólks
2.Kynferðisafbrot gegn börnum
3.Vændi

Já, held að flestir geti verið sammála um nauðsyn þess að endurskoða löggjöfina varðandi þessi mál.
Í dag er refsirammi vegna nauðgunar byggður á verknaðaraðferðum. Í því felst að nauðgun er aðeins sá verknaður sem að felur í sér ofbeldi eða hótun um ofbeldi. Refsing við þess konar brotum er fangelsisvist frá 1-16 ár. Hins vegar telst það ekki nauðgun ef að einhver notfærir sér ölvunarástand konu til að koma fram vilja sínum. Einnig telst það ekki nauðgun í skilningi laganna að koma fram vilja sínum við þroskaheftan einstakling. Þannig er refsiramminn 30 dagar- 3,4 eða 6 ár í þess háttar brotum. Í þessu nýja frumvarpi er hugtakið nauðgun skilgreint upp á nýtt og rýmkað mjög og þannig er refsiramminn fyrir brot eins og nauðgun á sofandi/áfengisdauðri manneskju eða það sem að áður flokkaðist undir misneytingu rýmkaður í 1-16 ár. Þetta er allt af hinu góða og fáránlegt að þetta hafi ekki allt talist nauðgun áður.
Ragnheiður fjallaði líka um fyrningu kynferðisafbrota og færði hún góð rök fyrir því að þau ættu að fyrnast. Hins vegar byrja þau ekki að fyrnast fyrr en um 18 ára aldur skv. frumvarpinu en þau byrja að fyrnast við 14 ára aldur í dag. Ég var sammála henni að þessi brot ættu að fyrnast eins og önnur brot en tel það vera mjög gott að fyrningafrestur hefjist ekki fyrr en eftir að þolandinn hefur náð "fullorðins" aldri. Í frumvarpinu er einnig kveðið á um að refsihámark fyrir kynferðislega áreitni gagnvart börnum verði hækkað um 2 ár og þannig lengist fyrningarfresturinn og fólk verður komið vel á fertugsaldur þegar að brotin fyrnast. Þetta er samt mikið hitamál og ég veit að það eru sko ekki allir sammála mér í þessu.
Að lokum fjallaði Ragnheiður um vændi. Með frumvarpinu var ákveðið að fara ekki svo kallaða sænska leið. Sænska leiðin felur í sér að kaupanda vændis er refsað. Tillögur frumvarpsins fela í sér að ákvæði um bann við sölu vændis til framfærslu verði afnumið og lögfest verði ákvæði um refsingu fyrir að bjóða fram, miðla eða óska eftir kynmökum í opinberum auglýsingum. Ég er ekki alveg búin að mynda mér skoðun á því hvort að þessi sænska leið sé góð eða slæm. Einhvern veginn finnst mér alveg rök fyrir því að það ætti að vera refsivert að kaupa vændi og ef að það er ólöglegt að bjóða fram, miðla eða óska eftir kynmökum, ætti þá ekki að vera ólöglegt að kaupa þau?? En eins og með allt þá eru rök með og á móti.

Ég á mér blogg...

og veit svo sem ekki alveg hvað ég er að vilja upp á dekk með það. Veit bara að ég er með blogg... punktur. Mér finnst eiginlega of heimspekilegt að fara að velta því fyrir mér af hverju ég sé bloggari, nenni ekki að fara í einhverja sjálfskönnun... bara hreinlega meika það ekki. Það er nóg að vera í yoga.

Fyrir utan það að skrifa sjálf blogg þá les ég blogg annarra. Það er alveg hreint merkilegt hvað maður dettur inn í þennan bloggheim, þessa bloggmenningu og getur hreinlega ekki stjórnað sér. Ég er bara á bólakafi. Hef nú eytt um það bil 3 klst í að lesa blogg hjá fólki út í bæ. Ekki fara nú að misskilja mig. Ég er ekki föst yfir "hvað ég gerði í gær" og "ég gerði 30 armbeygjur í ræktinni áðan" bloggum heldur bloggum sem eru uppfull af djúsí skoðunum um lífið og tilveruna.

Mig langar að vera djúsí bloggari. Finnst ég vera alltof löt við að skrifa blogg um pólitík og þjóðlífið. Af hverju er ég t.d. ekki búin að blogga um Ómar??? Ómar fer hamförum um landið og er kominn út úr skápnum með ýmislegt. Ómar er náttúruverndarsinni en ekki fréttamaður. Þetta eru ekki fréttir... bara alkunnar staðreyndir. Ég treysti því að Ómar hafi selt bílinn sinn (þegar að hann fjárfesti í Örkinni) og ferðist með strætó eins og sönnum náttúruverndarsinna sæmir. Hann á eflaust sæti pantað við hliðina á Bubba Morthens í leið 112. Þar sitja þeir eflaust og brosa framan í sólina, í sátt við náttúruna.
En hvað veit ég? Ekki hef ég komið til Austfjarða og séð dýrðina. Allaveganna segir Dr. Herdís þetta vera fallegra en Gullfoss. Valdi var ekki sammála, hann sagði þetta urð og grjót.

Af hverju blogga ég heldur ekki um brotthvarf Dagnýjar úr stjórnmálum. Er kannski einskis að sakna? Ætli hún hafi gefist upp á að fylgja Framsóknarforystunni í vafasömum málum eða er hún ef til vill bara dauðþreytt? Það er ekki eins og Framsókn hafi haft úr margmenni að moða þegar að þeir röðuðu í nefndir forðum daga.

Og af hverju hef ég ekki bloggað um leyniþjónustumálið og Björn Bjarnasona (aka Jón Spæjó) ?? eða þá um að varnarliðið sé farið? Sýnilegu varnir landsins eru horfnar og ósýnilegar varnir teknar við... þær eru svo ósýnilegar að enginn fær að vita neitt um þær (spúkí)....

Jæja kannski að ég taki mig á og fari að blogga um eitthvað sem að máli skiptir, blogga um eitthvað annað en að ég líkist Jessicu Simpson og ég þurfi að fara í megrun. Einhvern veginn er það nú samt bara svo að kommentin eru gjarnari á að koma á þess konar færslur.... þessar pólitísku gera fólk greinilega kjaftstopp!

Óþarfa atriði?

Pabbi minn er með ákveðinn sjónvarpssmekk. Hann hefur nú reyndar breyst dálítið í áranna rás en þó er óhætt að segja að hann fíli ekkert sérstaklega rómantískar gamanmyndir. Ef að maður býður honum upp á video-spólu þar sem að í treilernum koma fram orðin rómantík og gamanmynd þá bandar hann hendinni og fussar og sveijar. Ef maður getur samt með lævísum hætti komið myndinni í tækið þá á hann það til að myndspóla yfir öll atriði þar sem að fólk helst í hendur eða kyssist, kynlíf og allar þær senur þar sem að fólk er ekki mikið að tala saman. Sem sagt "óþarfa" atriði. Ef að myndin er hins vegar í sjónvarpinu þá skiptir hann bara um stöð meðan svona óþarfa atriði eru í gangi. Ég sá til að mynda ekki heilan koss í bíómynd þar til að ég flutti að heiman 19 ára gömul! Ég held samt að hann sé skárri með þetta núna, eitthvað að linast með aldrinum blessaður. :)

Sexy augu

Ef að fólk minnist á sexy augu þá nefnir það "sljó" augu í sömu andránni. Þá gengur fólk um með "þung" augnlok og er talið vera mjög sexy. Ég get tekið dæmi. Ef að við lítum til dæmis til Hollywood þá úir þar og grúir af fólki með sexy sljótt augnaráð t.d. Benicio Del Toro og Uma Thurman. Nú og ef maður lítur bara í kringum sig hérna innan landhelginnar þá get ég nefnt Darra hérna á Bifröst og svo Marínu mágkonu. Allt er þetta fólk með seiðandi augnaráð. Mig langar að vera með þannig augu, svona dularfullt augnarráð og vera gjörsamlega að drepast úr sexyheitum. Ég hef því hafið þrotlausar æfingar. Þær felast einna helst í því að ráfa um ganga skólans með hálflokuð augun og reyna að tæla fólk sem að á vegi mínum verður. Þrátt fyrir minniháttar meiðsl (ég gekk á hurð) þá hef ég ekki látið deigann síga.... fyrr en í morgun. Þá klessti ég á Trausta kennara sem að spurði mig hvað væri eiginlega að mér í augunum....... mission failed.....
Ég hef því aftur tekið upp mitt gamla augnarráð og þótt ég sé vonsvikin þá er ég pinku glöð því ég losna innan tíðar við alla plástrana.

Íranskar konur

Í gær fór ég í bíó (hérna á Bifröst) og sá mjög athyglisverða heimildarmynd "Divorce Iranian Style".
Í myndinni er fylgst með írönskum konum sem vilja lögskilnaði við eiginmenn sína.
Allar götur síðan 1979, eða þegar íslamska byltingin átti sér stað í Íran, hafa ákvæði sjaría laganna verið í gildi í Íran um hjúskaparrétt. Undir slíku kerfi er mjög erfitt fyrir konur að losna úr hjónabandi. Í því felst að til þess að konur geti fengið skilnað þá verður eiginmaðurinn annaðhvort að vera getulaus eða geðveikur! Báða þessa hluti er erfitt að sanna.
Mér fannst myndin mjög áhugaverð. Ég þekki persónulega ekki mikið til íransks samfélags en Magnús Þorkell Bernharðsson, sem sagður er sérfræðingur í málefnum Mið-Austurlanda, telur myndina veita góða innsýn í íranskt samfélag, um réttarfarið þar og stöðu kvenna. Hann tók samt fram (og ég horfði á myndina með því hugarfari) að þarna átti í hlut fólk sem að sjálfsögðu var tilfinningaríkt og í vissri geðshræringu. Það var jú að skilja. Þessi tilfinningahiti væri því ekki eins ríkjandi hjá fólki við aðrar aðstæður eins og gefur að skilja.
Í myndinni er fylgst með átökum hjóna í réttarsal dómara í Teheran og það sem að mér fannst athyglisverðast við myndina var það að giftingin er samningur milli manns og konu. Guð kemur þar málinu ekkert við. Samningurinn getur falið í sér alls kyns hluti, allt frá útivistartíma eða gjöfum til þessara venjubundnu heita. Til að mynda sömdu hjón á staðnum um að maðurinn yrði meira heima og sinnti konunni sinni betur. Þegar að það var komið á hreint og undirritað þá féll konan frá kröfu sinni um skilnað.
Mér fannst líka merkilegt hvað konurnar sem að komu fram í myndinni voru ákveðnar og líktust ekkert þeirri mynd sem oft er dregin upp af konum í Mið-Austurlöndum, þ.e. kúguðu þöglu konunni. Þær börðust af kjafti og klóm fyrir lögskilnaði eða forræði yfir börnum sínum. Mennirnir virkuðu oft á tíðum hálf utanveltu.
Að sama skapi blasti óréttlátt réttarkerfi við og mikið virðingarleysi fyrir rétti kvenna. Jafnrétti er ekki inn í myndinni. Eiginmaður getur skilið við konu sína hvenær sem er en eiginkona þarf að sanna getuleysi eða geðveiki eiginmannsins! Fyrir byltinguna 1979 var dæmt eftir lögum, líkum þeim sem að eru í Sviss, en nú er jafnrétti ekki fyrir hendi. Þannig varð á einu andartaki gjörbreyting á réttarkerfinu á kostnað kvenna. Það skiptir ekki máli hvort að konan sé óhamingjusöm, frelsi hennar til ákvarðana um sitt eigið líf er verulega takmarkað. Lögin eru karlmanninum í vil enda ráðamenn strangtrúaðir klerkar. Eftir myndina voru svo líflegar umræður um íranskt samfélag og gaman að sjá hve margir voru á myndinni og spurðu spurninga að henni lokinni.
Ég mæli hiklaust með þessari mynd ef að þið viljið sjá góða heimildarmynd.